បារាំង៖ ប្រធានាធិបតីបារាំង លោក អេម៉ាញូអែល ម៉ាក្រុង (Emmanuel Macron) បានចុចប៊ូតុងដំណើរការរាប់ថយក្រោយ ២០០ថ្ងៃ មុនការឈានមកដល់នៃព្រឹត្តិការណ៍អូឡាំពិក ទីក្រុងប៉ារីស ឆ្នាំ២០២៤ ដោយលោកបានជំរុញឱ្យសាធារណជនទាំងអស់ចូលរួមសកម្មភាពកីឡាឱ្យកាន់តែច្រើន ខណៈដែលប្រទេសនេះនឹងទទួលរៀបចំធ្វើជាម្ចាស់ផ្ទះកីឡាអូឡាំពិក នារដូវក្តៅជាលើកដំបូងបង្អស់ក្នុងរយៈពេល ១០០ឆ្នាំ។

តាមរយៈវីដេអូបណ្ដាញសង្គម X (អតីត Twitter)  លោក Macron ថ្លែងថា៖ "នៅសល់ត្រឹមតែរយៈពេល ២០០ថ្ងៃទៀតប៉ុណ្ណោះ ខណៈប្រទេសជាតិយើងមានបុព្វហេតុដ៏សំខាន់បំផុតមួយក្នុងឆ្នាំនេះគឺ កីឡា"។ កន្លងមក បារាំងបានដាក់ចេញនូវគោលការណ៍មួយគឺ សម្រាប់សិស្សថ្នាក់បឋម និងវិទ្យាល័យ ត្រូវមានម៉ោងកីឡាយ៉ាងហោចណាស់ ៣០នាទីរៀងរាល់ថ្ងៃ ដោយប្រធានាធិបតីបារាំងសង្ឃឹមថា នឹងមានការអនុវត្តសកម្មភាពកីឡាជាប្រចាំច្រើនជាងនេះបន្ថែមទៀត។ 

បន្ថែមពីលើនោះ លោក Macron ក៏បានរំលេចនូវគោលដៅសំខាន់របស់បារាំងក្នុងព្រឹត្តិការណ៍កីឡាអូឡាំពិក ឆ្នាំ២០២៤ នេះផងដែរ ដោយលោកថ្លែងថា ប្រទេសបារាំងនឹងធ្វើជាម្ចាស់ផ្ទះកីឡាអូឡាំពិក និងប៉ារ៉ាឡាំពិកដែលកាត់បន្ថយសារធាតុកាបូនច្រើនជាងគេបំផុតក្នុងប្រវត្តិសាស្ត្រ ជាព្រឹត្តិការណ៍កីឡាបៃតងគោរពតាមកិច្ចព្រមព្រៀងស្ដីពីអាកាសធាតុរបស់ទីក្រុងប៉ារីសផ្ទាល់។ មិនត្រឹមតែប៉ុណ្ណោះលោកបញ្ជាក់ថា បារាំងនឹងធ្វើជាម្ចាស់ផ្ទះការប្រកួតកីឡាដោយសមភាពយេនឌ័រ ដោយនឹងមានអត្តពលិកស្រ្តីច្រើនដូចបុរសដែរ ព្រមទាំងមានគណៈប្រតិភូពិសេសមួយចំនួននៃអត្តពលិកអូឡាំពិក និងប៉ារ៉ាឡាំពិក ហើយលោកសង្ឃឹមថា បារាំងនឹងទទួលបានមេដាយច្រើន។ 

គួរបញ្ជាក់ថា ព្រឹត្តិការណ៍៍កីឡាអូឡាំពិករដូវក្ដៅឆ្នាំ២០២៤ គ្រោងនឹងចាប់ផ្តើមនៅថ្ងៃទី២៦ ខែកក្កដា និងបញ្ចប់នៅថ្ងៃទី១១ ខែសីហានេះ ខណៈព្រឹត្តិការណ៍ប៉ារ៉ាឡាំពិក នឹងធ្វើឡើងជាបន្តចាប់ពីថ្ងៃទី២៨ ខែសីហា ដល់ថ្ងៃទី០៨ ខែកញ្ញា។ រូបរាងនៃមេដាយសម្រាប់ព្រឹត្តិការណ៍នេះនឹងបង្ហាញជាសាធារណៈនៅខែក្រោយ ខណៈភូមិកីឡាអូឡាំពិក នឹងរួចរាល់នៅថ្ងៃទី០១ ខែមីនាខាងមុខ៕